कार्यतालिका वःसा राजीनामा
माओवादीं थौं कार्यतालिका लःल्हाइगु
येँ (सन्ध्या टाइम्स)/स्वंगू दल दथुइ जूगु सहमति कार्यान्वयन यायेगु सवालय् माओवादी लचक जुइवं आः प्रधानमन्त्री नं लचक जुइगु जूगु दु। थौं सुथय् वालुवाटारय् प्रधानमन्त्री लगायत एमाले व कांग्रेसया नेतातय् दथुइ जूगु सहलहय् प्रधानमन्त्रीं थज्याःगु लचकता क्यनादीगु खँ सूत्रं धाःगु दु ।
उगु सहलहय् प्रधानमन्त्री माधव नेपालं यदि माओवादीं शान्ति प्रक्रिया बारे लिखित कार्यतालिका पेश यात धाःसा थम्हं राजीनामा बीगु बचं बियादीगु खः। शान्ति प्रक्रियायात गय् यानाः सार्थक यायेगु धइगु खँय् विवाद जुयाच्वंगु खःसा प्रधानमन्त्रीं यदि माओवादीपाखें थःपिनि लडाकुतय्त थय् थय् यानाः व्यवस्थापन यानाः शिविर खाली यायेगु जुइ धकाः लिखित कार्यतालिका पेश यात धाःसा थम्हं राजीनामा बी धकाः कनादीगु खँ बैठकय् दुथ्याःम्ह छम्ह कांग्रेसं नेतां कनादीगु दु ।
उखे प्रधानमन्त्रीपाखें थज्याःगु बचं वयेवं माओवादीं नं अज्याःगु कार्यतालिका तयार यायेगु ज्या शुरु याःगु खँ सीदुगु दु। थौं सुथय् च्वंगु माओवादी बैठकं अज्याःगु कार्यतालिका बारे 'होम वर्क' शुरु यायेगु धाःगु दु। सूत्रया कथं माओवादीं थौं तकया दुने कार्यतालिका बुझे यायेगु तयारी यानाच्वंगु दु ।
माओवादीं नं आः प्रधानमन्त्रीया राजीनामायात थःपिनि प्रमुख माग मधायेगु निर्णय याःगु दु। बरु संविधान दयेकेगु ज्यायात पूर्णता बीगु लागिं आः थःपिंसं वहे दिशाय् ज्या यायेगु खँ माओवादीं धाःगु दु। आः प्रधानमन्त्रीं राजीनामा बीगु लाकि मबीगु धइगु विषयय् विवाद यानाच्वन धाःसा उखे कांग्रेस व एमालें थ्वहे त्वहचिनाः संविधान दयेकेगु ज्यायात लिबाका बीगु व अन्ततः संविधान हे तयार मयायेगु तकया अवस्था वयेफुगुलिं माओवादीं लचक जुइगु नीति काःगु खँ धाःगु दु ।
थौं हे न्हिनय् स्वंगू दलया बैठक च्वनाः सेना समायोजनया मोडालिटी तयार याइगु खँ नं धाःगु दु। माओवादीं आः तयार याइगु कार्यतालिकाय् नं सेना समायोजनया विषयय् विवाद जुइफुगु कारणं उकियात लाइनय् हयेगु लागिं नं स्वंगू दल निं जानाः मोडालिटी तयार यायेत्यंगु खः ।
