माओवादी बन्दं अस्पताल ठप्प
येँ (सन्ध्या टाइम्स)/थः कार्यकर्ता स्याःगु विरोधय् थौं माओवादीपाखें याःगु अवध लागाया रुपेन्देही जिल्ला बन्दय् अन च्वंगु अस्पताल तकं ठप्प याना बिउगु दु। जिल्लाया थीथी थासय् च्वंगु अस्पतालत तकं बन्द जुइवं माओवादी कार्यकर्तातय्सं स्थानीय अम्बिका साह आँखा अस्पताल तकं बन्द याः वःगु खः। अस्पताल तकं बन्द यात धकाः अनया चिकित्सकत तम्वःगु दु ।
बन्दं यानाः उगु लागाया पसः, बजाः, स्कूल कलेज, कलकारखाना, यातायात पूर्ण रुपं ठप्प जुयाच्वंगु दु। थौं सुथय् बन्दया अवज्ञा यासें चले याना वःगु छगः मोटरसाइकल माओवादी कार्यकर्तातय्सं कब्जाय् कयाः उकी मि तया बिउगु दु। उमिसं अमर ओलीं चले याना वःगु बा. ३६ प ६४९७ नम्बरया मोटरसाइकलय् मि तया बिउगु खः ।
वंगु १७ गते अवध राज्य समितिया दुजः सपाटु यादवयात अज्ञात मनूतय्सं गोलीं कयेकाः स्याना बिउगु विरोधय् माओवादीं थ्व बन्द याःगु खः। उखे प्रहरीं हत्याया शंकाय् स्वम्ह मनूयात बन्दुक सहित ज्वंगु दु ।
