टुइन चबुनाः इन्जिनीयर बेपत्ता
येँ (सन्ध्या टाइम्स)/पश्चिम नेपाःया दार्चुलां टुइन गयाः भारतपाखे वनाच्वंम्ह इन्जिनीयर राजेन्द्र न्यौपाने टुइन चबुनाः महाकाली खुसिइ कुतुं वंगु दु ।
टुइन गयाः खुसि छिनाच्वंम्ह इन्जिनीयर न्यौपाने खुसिया दथुइ थ्यंकाः आकाझाकां टुइन चबुनाः खुसिइ कुतुं वंगु खः। थौं सुथय् कुतं वंम्ह वय्कः न्हिनय् तक बेपत्ता जुयाच्वंगु खँ धाःगु दु। वय्कःयात मालेगु लागिं अन प्रहरी व सशस्त्र प्रहरी परिचालन यानाच्वंगु दु ।
बेपत्ता जूम्ह इन्जिनीयर न्यौपाने विश्व खाद्य कार्यक्रम अन्तर्गत ज्या यानाच्वंम्ह खः। थःगु ज्याया झ्वलय् वय्कः भारत वनेत टुइन गः वंगु खः। उगु थासय् ताँ मदुगु कारणं स्थानीय मनूत जोखिमपूर्ण टुइन गयाः खुसि छीत बाध्य जुयाच्वंगु दु ।
