सहमतिया अपव्याख्या याःगु धासें माओवादीं आपत्ति प्वंकल
एकीकृत नेकपा (माओवादीं) प्रधानमन्त्रीं न्यान्हुया दुने राजीनामा बीगु मौखिक सहमतियात सत्तारुढ नेपाली कांग्रेस व नेकपा (एमालें) उल्लंघन याःगु द्वपं ब्यूगु दु । माओवादीं स्वंगू दलत दथुइ जूगु स्वंगू बुँदे सहमति पाखें संविधान व शान्ति निर्माण प्रकृयायात सहमतिया आधारय् न्ह्याकेगु न्हूगु सम्झदारीया आरम्भ जूगु तर थुकीयात सत्तारुढ दलं अपव्याख्या धाःगु धासें आपत्ति प्वंकूगु दु ।
बिहीवाः च्वंगु माओवादीया स्थायी समितिया बैठक लिपा पार्टी अध्यक्ष पुष्पकमल दाहाल 'प्रचण्डं' पिथनादीगु विज्ञप्तिइ प्रधानमन्त्री माधवकुमार नेपालं सहमति कथं राजीनामा मबियाः देय् व जनता प्रति कुठाराघात याःगु खँ धाःगु दु । नापं थुकीं माओवादीयात छखे लकेगु चालबाजी प्रष्ट जूगु खँ धा:गु दु ।
विज्ञप्तिइ हत्या, आतंक, अपहरण, दण्डहीनता व अराजकताया श्रृंखला व बजाः भाः थहांवंगु व भ्रष्टाचारया न्हूगु कीर्तिमान कायम याःगु वर्तमान सरकारं प्रतिगामी दिशा पाखे उन्मुख जुगू खँयात जनआन्दोलनया अपराधीयात नं विभूषित याःगु पाखें स्पष्ट जूगु खँ न्ह्यथनातःगु दु ।
सहमतिया उलंघन याःगु सरकारयात ग्वाहालि मयायेगु धासें माओवादीं राष्ट्रिय स्वाधीनता, जनतया सर्वोच्चता, शान्ति व संविधानया निंतिं राष्ट्रिय मंकाः सरकारया सुनिश्चितता मजुतल्ले आन्दोलन न्ह्याकेगु व उकीयात ग्वहालि यायेत दक्वं नेपाःमियात इनाप याःगु दु ।
