चितवन जिल्ला प्रशासनय् धर्ना

भक्तमान बचाउ अभियान व थीथी राजनीतिक दलतय्सं वीपी कोइराला मेमोरियल क्यान्सर अस्पतालया कार्यकारी निर्देशक डा. भक्तमान श्रेष्ठयात याकनं मालेत दबाव बीत बिहीवाः जिल्ला प्रशासन ज्याकूथीइ धर्ना ब्यूगु दु ।

झिंन्हय्न्हु जुइधुंकाः नं श्रेष्ठया अवस्था अझ सार्वजनीक मजूगु धासें बिहवाः सुथय् १० बजे निसें ११ बजे तक घौच्छि धर्ना ब्यूगु खः । धर्नाया कारणं कर्मचारीत ज्याकूथीइ दुहांवनेमफुगुलिं घौच्छि प्रशासनया ज्या प्रभावित जूगु खः । धर्नाय् चितवनया चिकित्सकत नापं थीथी राजनीतिक दलया स्थानीय नेता व कार्यकर्तातय् उपस्थिति दुगु खः ।

भक्तमान बचाउ अभियानं शुक्रवाः निघौ प्रशासन घेराउ यायेगु व कन्हय् तक नं श्रेष्ठया स्थिति सार्वजनिक मजुसाः अझ थप सशक्त ज्याझ्वः यायेगु खँ धाःगु दु ।