दलत दथुइ असहमति अझ नं कायम
प्रमुख स्वंगू दलत दथुइ जेठ १४ गते जूगु सम्झौता कार्यान्वयन यायेगु खँय् अझ नं सहमति जुइ मफुनी । स्वंगू दलं सम्झौतायात थःथःगु तरिकां व्याख्या यायेत शुरु यायेवं उकी एकरुपता हयेत प्रधानमन्त्री माधवकुमार नेपालं सःतुगु स्वंगू दलया थौंया बैठक नं असहमति दथुइ हे क्वचाल ।
बुधवाः न्हिनय् येँया न्हू बानेश्वर स्थित संविधानसभा भवनय् प्रधानमन्त्री सहित च्वंगु स्वंगू दलया शीर्ष नेतातय् बैठकय् माओवादीं प्रधानमन्त्रीया राजीनामा न्हापा जुइमाःगु खँयात लिसाः काःगु खः । कांग्रेस कार्यवाहक सभापति सुशील कोइरालां धाःसा सरकार व सहमति अन्तरसम्बन्धीत विषय जूगुलिं सहमति कार्यान्वयन जुइधुंकाः जक राष्ट्रिय सहमतिया सरकारया बारे खँ वइगु धयादिल ।
अथेहे प्रधानमन्त्रीं माधवकुमार नेपालं थः सहमतिया निंतिं बाधक मजुइगु धयादिसें राष्ट्रिय सरकराया खाका वःसा थः सहमति यायेत तयार जूगु धयादिल । एमाले अध्यक्ष झलनाथ खनालं असहमतिया दथुइ सहमति मालेमाःगु धायादिल ।
बैठकय् प्रधानमन्त्री नेपाल नापं माओवादी अध्यक्ष पुष्पकमल दाहाल 'प्रचण्ड' व उपाध्यक्ष नारायणकाजी श्रेष्ठ 'प्रकाश', कांग्रेसया कार्यवहाक सभापति सुशील कोइराला नापं संसदीय दलया नेता रामचन्द्र पौडेल व एमाले पाखें अध्यक्ष झलनाथ खनाल व वरिष्ठ नेता केपी ओलीया ब्वति दुगु खः ।
