सम्झौता कार्यान्वयन लिपा जक राजीनामा : एमाले
नेकपा (एमालें) माओवादीं पुलांगु सम्झौता कार्यान्वयन यायेधुंकाः जक प्रधानमन्त्रीं राजीनामा बीगु खँ धाःगु दु । बुधवाः क्वचाःगु स्थायी कमिटीया बैठकं पुलांगु सम्झौता कार्यान्वयन मजुइकं माओवादीं राजीनामा बीत दबाव बियाच्वंगु औचित्यहीन जूगु धासें सम्झौता कार्यान्वन लिपा जक प्रधानमन्त्रीया राजीमनामा वइगु स्पष्ट याःगु दु ।
माओवादीं न्यान्हुया दुने प्रधानमन्त्रीं राजीनामा बीमाःगु माग यानाच्वंगु इलय् एमालें प्रमुख स्वंगू दलत दथुइ जूगु सम्झौताय् गनं नं प्रधानमन्त्रीं थ्व कुन्हु हे राजीनामा बीगु धकाः च्वयामतःगु धासें शान्ति व संविधानया सुनिश्चिता जुसा: प्रधानमन्त्रीं राजीनामा बीगु खँ धाःगु दु । स्वंगू दलत दथुइ जूगु सम्झौताय् यथाशीघ्र सहमतिया सरकार गठन यायेत वर्तमान सरकारया प्रधानमन्त्रीं अविलम्व राजीनामा बीगु खँ न्ह्यथंनातःगु दु ।
अथेहे बैठकं राष्ट्रिय सहमतिया निंतिं अधिकतम लचकता क्यनेगु निर्णय याःगु दु । नापं शान्ति प्रकृया व संविधान निर्माणया निंतिं दलत दथुइ एकता कायम यायेत भूमिका म्हितेगु यायेगु निर्णय याःगु दु । मंगलवाः निसें न्ह्याःगु एमाले स्थायी कमिटीया बैठकय् अध्यक्ष झलनाथ खनाल व स्थायी कमिटी दुजः केपी शर्मा ओलीं स्वंगू दलत दथुइ जूगु स्वंगू बुँदे सहमतिया बारे दुजःतय्त जानकारी ब्यूगु खः ।
