सरकारं राई व राणाया पदक लितकाल
सरकारं विभूषण पदक समितिया बैठकं सिफारिस याःपिं डीआईजीत कुवेरिसंह राणा व दुर्जकुमार राईयात ब्यूगु पदक लितकाःगु दु ।
सरकारं गणतन्त्र दिवसया लसताय् ब्यूगु पदकय् जनआन्दोलनया दोषी व मानव अधिकार उल्लंघनकर्तात नं लाःगु धासें थीथी ख्यलं कुंखिनेवं मंगलवाः च्वंगु विभूषण समितिं राई व राणाया पदक लितकायेत मन्त्रिपरिषदयात सिफारिस याःग खः । उगु हे सिफारिसया अधारय् बुधवाः च्वंगु मन्त्रिपरिषद्या बैठकं राई व राणाया पदक लितकाःगु खः ।
अथेहे मन्त्रिपरिषदया बैठकं मेगू दँ निसें विभूषण ल्ययेगु प्रकृयायात पारदर्शी दयेकेत मापदण्ड निर्धारण यायेगु निर्णय याःगु दु । बैठक लिपा सरकारया प्रवक्ता शंकर पोखरेलं राष्ट्रया पाखें बीगु विभूषण्या मापदण्डयात विश्वासनीय दयेकेत मन्त्रिपरिषद् अन्तर्गतया सामाजिक समितियात जिम्मा ब्यूगु कनादिल ।
बैठकं बैदेशिक रोजगारीया झ्वलय् सीपिं ज्याःमितय् छेँजःयात सरकारं रहात बापत छगू लख बीगु निर्णय याःगु दु । नापं अपारदर्शी बैदेशिक सहायताया दुरुपयोग जूगु धासें अर्थ मन्त्रालयया पूर्व स्वीकृति कयाः जक अज्याःगु ग्वाहालि ध्यबाः लगानी यायेफइगु निर्णय याःगु दु ।
मन्त्रिपरिषदं जनआन्दोलनय् घाःपाः जुयाः सीम्ह रमाकान्त सुवेदीयात सहिद घोषणा यायेगु निर्णय याःगु दुसाः नेपाल रेल्वेया महाप्रवन्धकय् संजीवकुमार मल्लिकयात नियुक्त याःगु दु ।
