ज्ञानेन्द्रया भ्रमण भारतीय रुची मखु
पुलांम्ह जुजु ज्ञानेन्द्र शाह नापं नेपाली कांग्रेसया सभापति गिरिजाप्रसाद कोइराला व थीथी पार्टी तःधंपिं नेतातय्सं यानाच्वंगु भारत भ्रमण भारतया रुची कथं जुयाच्वंगु मखु धकाः नेपाःया निंतिं भारतीय राजदूत राकेश सुदं स्पष्ट यानादीगु दु ।थौं सुथय् वालुवाटार वनाः प्रधानमन्त्री पुष्पकमल दाहाल प्रचण्डयात नापलासें राजदूत सुदं थ्व खँ धयादीगु खः । राजदूत सुदयात प्रम प्रचण्डं पुलांम्ह जुजु लगायत थीथी पार्टी नेतातय्सं छगू हे इलय् पाः लाक्क भारत भ्रमण याःगु खँय् चिउताः प्वंकादीगु खःसा उकिया लिसः बीगु झवलय् राजदूत सुदं थ्व खँ स्पष्ट यानादीगु जानकारी वालुवाटार सूत्रं बिउगु दु ।
४५ मिनेट तक जूगु उगु भेटवार्ताया झवलय् वय्कःपिनि दथुइ नेपाः व भारतया सीमा सुरक्षा, भारतं नेपाःयात बी धाःगु विद्युत आपूर्ति बारे नं सहलह जूगु खँ नं बालुवाटार स्रोतं धाःगु दु ।
अथे हे वय्कःपिनि दथुइ भारतय् जुइत्यंगु लोकसभा चुनावया इलय् नेपाः-भारत सीमा बन्द यायेगु बारे नं सहलह जूगु खँ धाःगु दु ।
लुमंकेबह जू, नेपाःया पुलांम्ह जुजुया लिसें नेपाली कांग्रेसया सभापति गिरिजा प्रसाद कोइराला, एमालेया नेता केपी ओलीपिंसं भारत भ्रमणया झवलय् भारतया शीर्ष नेतात नं नापलाःगु खःसा उकियात कयाः नेपाःया राजनीतिक ख्यलय् थीथी कथंया चर्चा परिचर्चा जुयाच्वंगु दु । उगु भ्रमण लिपा नेपाली कांग्रेसया केन्द्रीय दुजःतय् आकस्मिक बैठक समेत च्वंगु खः ।
