'नेवाःत थप सशक्त जुयाः आन्दोलन न्ह्याकेमाः'
नेवाः स्वायत्त राज्य मंकाः संघर्ष समितिं थौं छगू आमसभा यानाः हाकुगु न्हि हंगु दु । समितिं नेपाःया भाषिक अधिकारयात सर्वोच्च अदालतं लाकाकाःगु विरुद्ध व संघीयता, गणतन्त्र, धर्मनिरपेक्षता व नेवाः स्वायत्त राज्य प्राप्तिया निंतिं उगु आमसभाया ग्वसाःग्वःगु खः ।
नेवाः स्वायत्त राज्य मंका: संघर्ष समितिया नायः नरेशवीर शाक्यया सभापतित्वय् येँया बसन्तपुली जूगु आसभाय् न्ववासें नेवाः नेतातय्सं संविधानसभाया ई दच्छि थप याःगु थुगु इलय् नेवाःत थप सशक्त जुयाः संघीयता, गणतन्त्र, धर्मनिरपेक्षता व नेवाः स्वायत्त राज्य प्राप्तिया निंतिं आन्दोलन यायेमाःगु खँय् बः ब्यूगु खः ।
नेवाः देय् दबूया नायः नरेश ताम्रकारं न्ह्याकादीगु ज्याझ्वलय् एनेकपा (माओवादी)या सभासद् हितमान शाक्य, नेपाली कांग्रेसया सभासद् तीर्थराम डंगोल, नेकपा (एमाले)या नेता राजेन्द्र श्रेष्ठ, नेवाः स्वायत्त राज्य मंका: संघर्ष समितिया नायः नरेशवीर शाक्य, नेवाः स्वायत्त राज्य मंका: संघर्ष समितिया सचिवालय सचिव मल्ल के. सुन्दर व ज्यापू समाज यलया प्रेम डंगोलं न्ववानादीगु खः । उगु सभाय् कलाकारतय्सं हुला प्याखँ व म्ये नं हाःगु खः ।
लुमंकबहजु, २०५६ जेठ १८ गते सर्वोच्च अदालतं नेपालभाषा व मैथिली भाय्यात स्थानिय निकाय पाखें आधिकारीक रुपं छ्यले मदुगु छय्के मदुगु धकाः फैसला न्यंकूगु न्हियात नेवाःत नापं नेपाःया आदिवासी जनजातितय्सं हाकुगु न्हि कथं हनावयाच्वंगु दु ।
मेमेगु आपालं किपाया लागि थन क्लिक यानादिसँ
