राई व राणाया पदक लितकायेत सिफारिश
पदक विरुद्ध सर्वोच्चय् रिट
सरकारं जनआन्दोलनय् दोषी डीआईजी दुर्जकुमार राई व मानव अधिकार उलंघनया द्वपं लाम्ह एसपी कुवेरसिंह राणाया पदक लितकाइगु जूगु दु । विभूषण पदक समितिया मंगलवाः च्वंगु बैठकं डीआईजी राई व एसपी राणायात ब्यूगु पदक विवादित जूगु धासें लितकायेत मन्त्रिपरिषदयात सिफारिश याःगु ख: । समितिं राई व राणापाखें पदकया विषयलय् पुर्नबिचार यायेगु निवेदन कयाः पदक लितकायेत मन्त्रिपरिषदयात सिफारिश याःगु खः ।
जनआन्दोलनया दोषी धकाः रायमाझी आयोगया प्रतिवेदनय् दुथ्याःपिं तत्कालीन प्रधानसेनापति रुकमांग कट्वाल डीआईजी राई व एसपी राणायात पदक बियाः सरकारं सहिदया बलिदानया अपमान याःगु धासें थीथी ख्यलं विरोध याःगु खः ।
उखे ईन्हुरेड इन्टरनेशनलं पदकया विरुद्ध सर्वोच्चय् रिट दायर याःगु दु । इन्टरनेशनलया पाखें पदक वितरण अन्तरिम संविधान विपरीत जूगु धासें उगु निर्णय बदर यायेमाःगु माग यासें सर्वोच्चय् रिट दयार याःगु खः ।
