लडाकु समायोजन यायेत माओवादी अनइच्छुक : पोखरेल
सूचना व संचार मन्त्री शंकार पोखरेलं माओवादीं थः कमजोर जुइगु ग्याःचिकूं लडाकु व्यवस्थापन यायेत अनइच्छुक जूगु खँ धायदीगु दु । वय्कलं थ्वहे कारणं समस्या ब्वलंगु धयादिसें दलत दथुइ व्याप्त अन्तरद्वन्द्वया दुगु इलय् सहमतिया नांमय् सहमति यानाः जक समस्या समाधान मजुइगु धयादिल ।
बारुदी सुरुङ प्रतिबन्ध अभियान नेपालं मंगलवाः ग्वसाःग्वःगु छगू गोष्ठीइ मन्त्री पोखरेलं माओवादीं ल्वाभःया बलय् जनसत्ता स्थापना यायेगु बिचाः त्याग मयातल्ले दिगो शान्ति व संविधान निर्माण याये थाकुइगु धयादिल । वय्कलं विस्तृत शान्ति सम्झौता, झिंनिगू बुँदे समझदारी व अन्तरिम संविधान प्रति प्रतिबद्ध मजुसें थुकीयात ल्वाभःया कथं माओवादीं छ्यलाच्वंगुलिं राजनीतिक गतिरोध समाधान मजूगु धयादिल ।
जेठ १४ गते प्रमुख स्वंगू दलत दथुइ न्यान्हुया दुने प्रधानमन्त्री राजीनामा यायेगु मखसें राजनीतिक निकास बीत मेगू न्हूगु सम्झौता यायेगु सहमति जूगु धयादिल । वय्कलं शान्ति व संविधानया एजेण्डा सुनिश्चि जुसाः प्रधानमन्त्री राजीनामा बीत तयार जूगु धयादिल ।
