सरकारं बिउगु पदकया हरिबिजोग
येँ (सन्ध्या टाइम्स)/देशय् गणतन्त्र स्थापना यायेत योगदान बिउपिं धकाः सरकारं प्रदान याःगु पदकया हरिबिजोग जूगु दु। पदक लाःपिं फुक्क हे हनेबहःपिं मनूतय्सं उकियात बहिष्कार यायेवं सरकारी पदकया बिजोग जूगु खः ।
म्हिगः पुलांम्ह सभामुख दमनानाथ ढुंगाना, मानव अधिकारकर्मी पद्मरत्न तुलाधर, सुवोध प्याकुरेल व भरत प्रधानं नं छगू विज्ञप्ति पिकासें उगु पदक काये मखु धकाः घोषणा याःगु खः ।
जनआन्दोलनयात दमन याःपिं मनूतय्त तकं पदक बिल धकाः पदक लाःपिं मनूतय्सं उकियात बहिष्कार याना हःगु खः ।
सूत्रं बिउगु जानकारी कथं पदक विवादय् लायेवं थुकथं पदक बीमाःपिं मनूतय् नां गय् यानाः सिफारिस जुया वल धकाः सरकार दुने चर्चा शुरु जूगु दु। गय् यानाः अज्याःपिं विवादास्पद मनूतय् नां सिफारिस जुया वल धकाः सरकारया सम्बन्धित निकायपाखें मालेगु ज्या नं शुरु याःगु खँ सूत्रं धाःगु दु ।
छगू विज्ञ सूत्रं धाः कथं पदकया लागिं नां सिफारिस यायेगु थ्व ज्याय् एमाले नेता खड्ग ओलीया विशेष भूमिका दु। ओलीं थःगु पक्षया आपालं मनूतय् नां उकी समावेश याःगु खँ नं सूत्रं धाःगु दु ।
उखे नागरिक समाजं पञ्चायती शैलीं बीत्यंगु थज्याःगु पदक बहिष्कार यायेत सकलें जिम्मेवार मनूतय् इनाप याःगु दु। समाजं म्हिगः छगू ज्ञापनपत्र नं बिउगु दु ।
