बाबुराम भक्तमानया छेँय्
येँ (सन्ध्या टाइम्स)/वंगु निवाः न्ह्यवंनिसें बेपत्ता जुयाच्वंम्ह डा. भक्तमान श्रेष्ठया अवस्था याकनं सार्वजनिक जुइगु आशा माओवादी नेता डा. बाबुराम भट्टराईं व्यक्त यानादीगु दु। थौं नारायणगढय् डा. श्रेष्ठया कलाःयात नापलाना वयेधुंकाः वय्कलं सञ्चारकर्मीतय्त थ्व खँ धयादीगु खः ।
वय्कलं अन डा. श्रेष्ठया कलाःयात नं नापलानादीगु खः। उगु इलय् वय्कःपिनि दथुइ करिब १ घण्टा गोप्य वार्ता जूगु खः। वार्ताय् छु खँ जुल धइगु खँ धाःसा सी मदुनि ।
डा. भक्तमान श्रेष्ठया अपहरणय् माओवादीया हे ल्हाः दु धकाः पिने चर्चा जुयाच्वंगु इलय् डा. भट्टराई थःहे वनाः श्रेष्ठया कलाःयात नापलानादीगुलिं थुकियात मनूतय्सं अर्थपूर्ण रुपं कयातःगु दु। तर सञ्चारकर्मीलिसे खँ ल्हायेगु झ्वलय् डा. भट्टराईनं थ्व प्रकरणय् माओवादीया नं ल्हाः दु धइगु खँयात धाःसा पूर्ण रुपं अस्वीकार यानादिल ।
लिसें वय्कलं पत्रकारतय्त तथ्य खँ मसीकं हल्लाया भरय् समाचार मच्वयेत नं इनाप यानादिल। वय्कलं पत्रकारतलिसे नं खँ ल्हासें थुकिया अनुसन्धान यानाः डा. श्रेष्ठया अवस्था याकनं सार्वजनिक जुइगु आशा नं प्वंकादिल।
डा. श्रेष्ठयात माओवादी समर्थित बुद्धिजीवी कथं कयातःगु दु। वय्कःया पहुँच माओवादी दुने तप्यंक अध्यक्ष प्रचण्डलिसे हे दु धाइ ।
