एन-प्याब्सनं शिक्षा कर मपुलीगु
ख्वप (सन्ध्या टाइम्स)/एन-प्याब्सन ख्वपया निक्वःगु तःमुँज्या एन-प्याब्सन ख्वप जिल्ला अध्यक्ष राजेन्द्र कोजूया सभापतित्वय् जुल। तःमुँज्यां सरकारं घोषणा यानातःगु शिक्षा सेवा कर गुगुं नं हालतय् मपुलेगु निर्णय याःगु दु। ज्याझ्वलय् एन-प्याब्सनया केन्द्रीय अध्यक्ष गीता राणां सरकारं निजी विद्यालयतय्त कायेगु धाःगु ५ प्रतिशत कर पुलेगु निंतिं अभिभावतय्के थप दां म्हये मफइगु जुयाः थुगु कर मपुलेगु खँ कनादिल ।
ज्याझ्वलय् एन-प्याब्सनया उपाध्यक्ष पंकज राठोर, महासचिव ऋतुराज सापकोटा, कोषाध्यक्ष सूर्र्यबहादुर अधिकारी, ख्वपया अध्यक्ष भुवनलाल श्रेष्ठपिंसं न्ववानादीगु खः। जिल्लाया पीगू विद्यालय दुथ्याःगु एन-प्याब्सनं आः याकनं हे थःपिनिगु उच्च मावि सञ्चालन यायेगु खँ धाःगु दु ।
