वज्राचार्य अध्ययन मण्डलया बुन्हि
येँ (सन्ध्या टाइम्स)/वज्राचार्य अध्ययन मण्डलया ३१ क्वःगु बुन्हि छुस्या बाहालय् न्यायेकल। पण्डित बद्रीरत्न वज्राचार्यया सभापतित्वय् जूगु उगु ज्याझ्वः ३१ प्वाः मत च्याकाः उलेज्या याःगु खः। लिसें ज्याझ्वलय् त्रिरत्न शरण गमन व ब्रम्हादीदेव पाठ नं जूगु खः ।
त्रिरत्न वज्राचार्यं लसकुस यासें न्ह्याकूगु उगु ज्याझ्वलय् वज्राचार्य अध्ययन मण्डल म्हसीका मणिरत्न वज्राचार्यं बियादीगु खः ।
अथे हे ज्ञानीराजा वज्राचार्य व अष्टमुनि वज्राचार्यपिंसं अध्ययन मण्डल व वज्राचार्यपिनि भूमिका बारे कनादीगु खः।
ज्याझ्वलय् अध्ययन मण्डलया विद्यार्थीतय्पाखें चर्यागिती व पंच ताल नं न्ह्यब्वःगु खः। अध्ययन मण्डलपाखें दँय्दसं थीथी बाहालय् थुकथं हे थःपिनि बुन्हि हनेगु ज्याझ्वः याना वयाच्वंगु दु ।
