माओवादी पाखें नीछगू दल नाप सहलह
एकीकृत नेकपा (माओवादीं) संविधानसभाय् दुथ्याःगु नेपाली कांग्रेस व नेकपा (एमाले) बाहेकया दलतनाप सहलह याःगु दु । प्रमुख स्वंगू दलत दथुइ जूगु सहमतिया बारे नेतातय्सं थःथःगु कथं हे व्याख्या जुयाच्वंगु इलय् माओवादीं सहमति कार्यान्वयनय् ग्वाहालि यायेत उगु बैठक सःतुगु खः ।
बैठकय् माओवादी अध्यक्ष प्रचण्डं स्वंगू दल दथुइ लिखित व अलिखित निथि सम्झौता जूगु धयादिसें न्यान्हुया दुने प्रधानमन्त्रीं राजीनामा बीगु अलिखित सहमति जूगु धयादिल । वय्कलं उगु सहमतियात कांग्रेस व एमाले मेगू हे कथं व्याख्या यानाः सहमति पूवंकेत लिचिला च्वंगु धयादिसें सहमति कार्यान्वयनय् ग्वाहालि यायेत इनाप यानादिल ।
अथेहे माओवादी उपाध्यक्ष नारायणकाजी श्रेष्ठ 'प्रकाशं' प्रधानमन्त्रीया राजीनामा नाप मेगू छुं नं सम्झौता मजूगु धयादिसें न्हापा प्रधानमन्त्रीया राजीनामा यायेगु सहमति स्वंगू दल दथुइ जूगु धयादिल ।
उगु इलय् माओवादी बाहेकया दलतय्सं तःधंगु दलतय्सं सहमतिया साक्षीया कथं जक चीचीधंगु दलयात उपयोग यानाच्वंगु धासें प्रमुख स्वंगू दलया ज्यायात कुखिंगु खः । नापं दलतय्सं प्रमुख स्वंगू दलत दथुइ जूगु सहमतिया बारे सत्य तथ्या सीकेत नीप्यंगूलिं दलया बैठक सःतेत इनाप याः गु खः ।
