माओवादी नेतातय्सं बेपत्ता श्रेष्ठया छेँजःयात नापलात
घटनाय् माओवादी संलग्नता मदु : भट्टराई
बीपी कोइराला क्यान्सर अस्पतालया कार्यकारी निर्देशक डा. भक्तमान श्रेष्ठया अपहरणय् एनेकपा (माओवादी)या संलग्नता दुगु बुखँत पिहांवयाच्वंगु इलय् माओवादी नेतातय्सं श्रेष्ठया छेँजःयात नापलाना खँल्हाबंला याःगु दु ।
मंगलवाः माओवादी उपाध्यक्ष डा. बाबुराम भट्टराईया नेतृत्वय् वंगु नेतातय् पुचलं श्रेष्ठया जाहान शिलु व मेपिं छेँजःयात नापलागु खः । भट्टराई नापं स्थायी समिति दुजः गिरिराजमणि पोखरेल व वर्षमान पुनं श्रेष्ठया छेँजःयात नापलायेत चितवन वःगु खः ।
माओवादी नेतात चितवन क्यान्सर अस्पताल थ्यंकाः श्रेष्ठया छेँजः नापलायेगु झ्वलय् नेतातय्सं बेपत्ता घटनाय् माओवादी पार्टीया संलग्ना मदुगु दाबी यासें श्रेष्ठया अवस्था सीकेत माओवादी लगेजुयाच्वंगु जानकारी ब्यूगु खः ।
अथेहे श्रेष्ठया छेँजः नापलाये न्ह्यः भरतपुर विमानस्थलय् पत्रकारत नाप खँल्हाबंला यानादिसें नेता भट्टराईं डा. श्रेष्ठ बेपत्ता प्रकरणय् माओवादीया छुं नं संलग्नता मदुगु दावी यानादिल । वय्कलं छुं आधार व प्रमाण बिना माओवादीयात घटना नाप स्वाःगु धयादिसें यदि माओवादी कार्यकर्तातय् थुगु घटनाय् संलग्नता दुगु खःसा कारवाही यायेगु प्रतिबद्धता प्वंकादिल ।
मेगू छगू प्रशंगय् वय्कलं प्रमुख स्वंगू दलत दथुइ जूगु सहमति स्यंकेत सत्तारुढ दलत लगेजुयाच्वंगु धयादिसें बुधवाः तक प्रधानमन्त्रीं राजीनामा मब्यूसाः गम्भीर परिणाम भोगे यायेमालीगु ख्याच्वः बियादिल ।
