मेघालय घटनाप्रति परराष्ट्रया च्यूताः

परराष्ट्र मन्त्रालयं भारतया आसाम व मेघालय राज्यया सीमा क्षेत्रय् च्वनावयाच्वंपिं नेपाली समुदाययात जूगु ज्यादतीया सम्बन्धय् गम्भीरतापूर्वक अध्ययन यानाच्वंगु खँ धाःगु दु । मन्त्रालयया प्रवक्ता दुर्गाप्रसाद भट्टराई पाखें सोमवाः पिथंगु विज्ञप्तिइ उगु क्षेत्रय् च्वनावःपिं नेपालीतय् हत्या व विस्थापन प्रति खेद प्वंकूगु दु ।

विज्ञप्तिइ मन्त्रालयं प्रभावित क्षेत्रया नेपालीतय् सुरक्षायात निंतिं तत्काल पला: ल्ह्वनेत भारत सरकार इनाप यासें उगु घटनाय् नेपाः सरकार संवेदशील जूगु खँ न्ह्यथंगु दु । भारतया असाम व मेघालय राज्य सीमावर्ती क्षेत्रय् स्थानीय खासी जातितय्सं नेपालीतय्त याःगु ज्यायादतीया कारणं छुं नेपाली सीगु दुसाः द्वलंद्वः विस्थापित जूगु दु ।