पदकया विरुद्ध सहिद परिवारया चक्काजाम

सरकारं गणतन्त्र दिवसया लसताय् थीथी ख्यःया व्यत्तित्वतय्त ब्यूगु पदकय् जनआन्दोलनया दोषीत नं लाःगु धासें सहिदया छेँजःपिंसं सोमवाः येँया कलंकीइ चक्काजाम याःगु दु । रायमाझी आयोग पाखें दोषी ठहर याःपिन्त सरकारं पदक बियाः सहिदतय् अपमान याःगु धासें सहिदया छेँजः, नागरिक समाज लगायतं घौछि चक्काजाम याःगु खः । उगु इलय् चक्कजामय् ब्वति काःपिंसं सरकार विरुद्ध नाराबाजी यासें तत्काल सरकारं अज्याःपिं दोषीतय्त ब्यूगु पदक लितकायेत माग याःगु दु ।

अथेहे थौं हे सहिदया छेँजःपिंसं प्रधानमन्त्रीयात नापलाना जनआन्दोलनया दोषीतय्त ब्यूगु पदक लितकायेत ज्ञापनपत्र लःल्हागु दु ।