स्वंगू दल पुलांगु हे अडानय्
प्रमुख स्वंगू राजनीतिक दलतय्सं प्रधानमन्त्रीया राजीनामा न्हापा वा न्हापा माओवादीं सहमति पालना यायेगु धैगु हानं पुलांगु हे अडान काःगु दु । सोमवाः न्हिनय् च्वंगु स्वंगू दलया बैठक थ्वहे कारणं निष्कर्षविहीन जूगु दु ।
येँया न्हूगु बानेश्वर स्थित संविधानसभा भवनय् च्वंगु स्वंगू दलया बैठकय् माओवादीं स्वंगू दलत दथुइ जूगु सहमतिलय् न्यान्हुया दुने प्रधानमन्त्रीं राजीनामा बीगु मौखिक सहमति जूगुलिं प्रधानमन्त्रीया राजीनामा न्हापा जुइमाःगु अडान याःगु दु ।
अथेहे कांग्रेस-एमालें धाःसा माओवादीं थ्वस्वयां न्ह्यः प्वंकूगु प्रतिबद्धता पूवंकेमाःगु व सेना समायोजनया बारे सहमति जुइधुंकाः जक प्रधानमन्त्रीं राजीनामा बीगु पुलांगु हे अडान लिसाः काःगु दु ।
बैठकय् माओवादीया वरिष्ठ उपाध्यक्ष मोहन वैद्य, उपाध्यक्षत डा. बाबुराम भट्टराई व नारायणकाजी श्रेष्ठ 'प्रकाश' नापं प्रवक्ता दिनानाथ शर्माया ब्वति दुगु खः । अथेहे कांग्रेस पाखें कार्यवाहक सभापति सुशील कोइराला, संसदीय दलया नेता रामचन्द्र पौडेल, महामन्त्री विमलेन्द्र निधि, अर्जुननरसिंह केसी, कृष्ण सिटौला व एमाले पाखें अध्यक्ष झलनाथ खनाल, महासचिव इश्वर पोखरेल, भरतमोहन अधिकारी लगायत नेतातय् उपस्थिति दुगु खः ।
