असहमति व अविश्वास ब्वलंकेमते : माओवादी
क्षमताया आधारय् सेना समायोजन : एमाले
एकीकृत नेकपा (माओवादीं) सहमतिया वातावरणय् खलल लाइगु कथं आपत्तिजनक वक्तव्यबाजी यानाः असहमति व अविश्वास मब्वलंकेत कांग्रेस व एमालेयात इनाप याःगु दु ।
माओवादी स्थायी समितिया सोमवाः च्वंगु बैठकं कांग्रेस व एमालें सहमति स्यंकेगु कथं आपत्तिजनक अभिव्यक्ति ब्यूगु धासें चिन्ता प्वंकूगु दु । माओवादीं सहमति प्रति इमान्दार जुइत प्रधानमन्त्री नापं सम्बन्धित दलतय्त इनाप यासें प्रधानमन्त्रीं तत्काल राजीनामा बीमाःगु खँ धाःगु दु ।
स्वंगू दलत दथुइ प्रधानमन्त्रीं न्यान्हुया दुने राजीनामा बियाः सहमतिया वातावरण सुनिश्चित यायेगु व ल्यं दनीगु विषयलय् सहलह यानाः समाधान यायेगु आन्तरिक सहमति जूगु दावी माओवादीं याःगु दु ।
उखे सोमवाः हे च्वंगु एमाले स्थायी कमिटीया अनौपचारिक बैठकं माओवादी लडाकुया योग्यता व क्षमताया आधारय् सेना समायोजन यायेमाःगु निष्कर्ष पिकाःगु दु । समायोजनय् मलापिं लडाकुतय्त पुनर्स्थपनाया प्याकेज तयार यायेमाःगु खँ नं एमालें धाःगु दु ।
