थीथी व्यक्ति पाखें पदक अस्वीकार
प्रधानन्यायाधीश लगायतं पदक वितरण प्रति आपत्ति
गणतन्त्र दिवसया लसताय् सरकारं ब्यूगु पदकयात थीथी व्यक्तित्वय्सं अस्वीकार याःगु दुसाः प्रधानन्यायाधीश रामप्रसाद श्रेष्ठ लगायत थीथी मानवअधिकारवादी संघसंस्थातय्सं आपत्ति प्वंकूगु दु ।
सरकारं घोषणा याःगु पदकयात वरिष्ठ पत्रकार युवराज घिमिरे, मेम्ह पत्रकार कनकमणि दीक्षित, कालकारत मदनकृष्ण श्रेष्ठ व हरिवंश आचार्य, नागरिक समाजया न्ह्यलुवाः डा. महेश मास्के लगायतं पदक अस्वीकार याःगु दु ।
पत्रकार घिमिरें पदक लय्येगु विधि अपारदर्शी जूगु धासें पदक अस्वीकार यानादीगु खः । अथेहे मेम्ह पत्रकार दीक्षितं थम्ह याःगु राजनीतिक विश्लेषणया विधाय् थ्व सम्मान उपयुक्त मजूगु धयादिसें राजनीतिक क्षेत्र नापं च्वनाः ज्या याइपिन्त संक्रमणकालय् थुकथंया सम्मान यायेगु उपयुक्त मजूगु खँ धयादिल ।
अथेहे नागरिक समाजया मास्कें जनआन्दोलनया दोषीत दुगु पदकया धलखय् थःगु नां नं दुगुलिं अपमानित महशुस जूगु धयादिल । उखे जनआन्दोलन निसें माओवादी आमहड्ताल तक नागरिक दबाव ब्यूगु योगदानया स्वरुप पदक ब्यूपिं कलाकार श्रेष्ठ व आचार्यं नं थः पिनिगु पदक अस्वीकार याःगु दु ।
विवादय् लागु थुगु पदकयात मन्त्रिपरिषदं न्याम्ह न्यायाधीयात थः यथें पदक ब्यूगुलिं न्यायपालिया स्वतन्त्रता व निष्पक्षताय् आँच लाःगु धासें प्रधानन्यायाधीश श्रेष्ठ आपत्ति प्वंकूगु दु । वय्कलं न्यायपालिका प्रमुख व न्याय परिषद् अध्यक्ष प्रधानन्यायाधीश नाप छुं नं सम्पर्क, समन्वय व आवश्यक सहलह मयासें न्यायाधीशतय्त मन्त्रिपरिषदं तप्यंक सिफारिश यानाः पदक ब्यूगु प्रति आपत्ति प्वंकादीगु खः ।
अथेहे जनआन्दोलनया दोषी धकाः रायमाझी आयोगं ठहर यानात:पिं पुलाम्हं प्रधानसेनापति रुकमांग कट्वाल, पुलांपिं प्रहरी अधिकारीत कुवेरिसंह राणा व दुर्जकमार राईयात नं सरकारं पदक ब्यूगु प्रति थीथी मानवअधिकार संस्था, नागरिक समाज लगायत सहिद परिवारं आपत्ति प्वंकूगु दु ।
