जेठ १८ हाकुगु न्हि न्यायेकेत सहलह
येँ (सन्ध्या टाइम्स)/नेवाः स्वायत्त राज्य मंकाः संघर्ष समितिया ग्वसालय् थौं सुथय् जूगु छगू सहलह मुँज्याय् कंस जेठ १८ गते यायेत्यंगु हाकुगु न्हिया ज्याझ्वः ताःलाकेगु विषययात कयाः बिचाः ब्याकल। ज्याझ्वलय् नेवाः खलः पुचः, नेवाः न्ह्यलुवाः नापं त्वाःबाहाःया मनूतय्सं ब्वति काःगु खः ।
संघर्ष समितिया नायः नरेशवीर शाक्यया सभापतित्वय् जूगु उगु ज्याझ्वलय् संघर्ष समिति सचिवालय सचिव मल्ल के. सुन्दरं कंस न्यायेके त्यनागु हाकुगु न्हिया ज्याझ्वलय् ब्यापक रुपं जनपरिचालन यायेमाःगु बिचाः प्वंकादीगु खः। संविधानसभाया म्याद दछि थपे याःगु थ्व ईयात आः नेवाःतय्सं नेवाः स्वायत्त राज्य प्राप्त यायेगु आन्दोलनयात अझ तीव्र याये माःगु खँ नं वय्कलं कनादिल। वय्कलं थ्व सशक्त आन्दोलनया शुरुवात आः कंसंनिसें हे न्ह्याकेमाःगु बिचाः नं प्वंकादिल ।
संघर्ष समितिया सल्लाहकार व मंकाः खलःया नायः पद्मरत्न तुलाधरं प्रत्येक नेवाःत व्यक्तिगत रुपं कार्यकर्ता व योद्धा जूसा जक झीगु ज्या सार्थक जुइ धासें त्वाःत्वालय् च्वंपिं नेवाःतय्त उत्साहित यानाः क्वकायेमाः धयादिल। ज्याझ्वलय् नेपाली कांग्रेसया नेता भिमसेनदास श्रेष्ठ, सभासद् दिलीप महर्जन, ज्यापु महागुथिया विपिन महर्जन लगायतपिंसं नं थःथःगु बिचाः प्वंकादीगु खः ।
