ओली प्रति प्रचण्डया विश्वास
येँ (सन्ध्या टाइम्स)/एकीकृत नेकपा (माओवादी) यात दकलय् अप्वः ब्वः बियाः भाषण याइम्ह नेकपा (एमाले) या वरिष्ठ नेता केपी शर्मा ओलीयात लिपांगु इलय् वयाः माओवादीया नायः पुष्पकमल दाहाल 'प्रचण्डं' तसकं विश्वास यानाहःगु दु ।
वंगु शुक्रवाः बहनी तक नं संविधानसभाया म्याद थप यायेगु खँय् दलतय् दथुइ सहमति मजुयाच्वंगु इलय् प्रचण्ड व ओली दथुइ फोनय् खँ जुइवं हे प्रचण्डं ओलीया खँय् विश्वस याःगु अले अनं लिपा हे सहमति जूगु खँ एमालेया छम्ह नेतां कनादीगु दु ।
सहमतिया नितिं प्रधानमन्त्रीं याकनं राजीनामा यानाः राष्ट्रिय सरकारया लँपु चायेकेगु धकाः माओवादीं अडान कयाच्वंगु अले एमाले व कांग्रेसं प्रमया राजीनामाया खँ सहमतिइ उल्लेख याये फइ मखु धकाः ढिपि यानाच्वंगु इलय् ओलीं 'राजीनामाया खँ सहमतिइ च्वःसां जिउ' धकाः वाउँगु मत च्याकेवं अज्याःगु सहमति जूगु खः ।
नेता ओलीं न्यान्हुया दुने प्रधानमन्त्रीं राजीनामा बियादी धकाः धायेवं हे सहमति जूगु खः। नेता ओलीं एमालेया नेतातय्त तकं टेलिफोन यानाः प्रधानमन्त्रीं याकनं हे राजीनामा बी धकाः च्वःसां छुं पाइमखु धयादीगु खः। वय्कःया खँ कांग्रेसया छुं नेतातय्सं माने मयायेवं नेता ओलीं तप्यंक हे 'प्रधानमन्त्री जिमिगु पार्टीयाम्ह खः उकिं जिमिसं धाः थे जुइ' धकाः लिसः बियाछ्वःगु खँ नं सूत्रं धाःगु दु ।
नेता ओलीया खँयात माओवादी अध्यक्ष प्रचण्डं विश्वास याःगु खनाः स्वयं एमाले, कांग्रेस व माओवादीया नेतात नं अजूचाःगु दु। एमालेया अध्यक्ष ला झलनाथ खनाल खः, तर प्रधानमन्त्रीया राजीनामा वइ धइगु खँ धाःसा केपी ओलीं धायेधुंकाः तिनि प्रचण्डं पत्याः याःगु खः ।
