संघीयता विरोधीया पुत्ला च्याकल
येँ (सन्ध्या टाइम्स)/नेवाः स्वायत्त राज्य मंकाः संघर्ष समितिया ग्वसालय् शुक्रवाः छगू ज्याझ्वः यासें धर्म निरपेक्षता व संघीयता विरोधीतय् पुत्ला च्याकल। थनया असनं पुत्ला समेत पिहां वःगु जुलुस रत्नपार्कया शान्ति बाटिकाय् थ्यंकाः च्याकेगु ज्या जूगु खः। उगु इलय् धर्मनिरपेक्षता विरोधी व संघीयता विरोधी धकाः निगू अलग अलग हे पुत्ला च्याकूगु खः ।
असनं शुरु जूगु जुलुसं संघीयता विरोधी मुर्दावाद, धर्म निरपेक्षता विरोधी मुर्दावाद, अग्रगामीतय्गु मंकाः सरकार गठन या, न्हूगु नेपाः दयेके दयेके, नेवाः स्वायत्त राज्य कायम या धइगु नारा थ्वयेका वःगु खः ।
जुलुस रत्नपार्कय् थ्यनेधुंकाः सतकया दथुइ तयाः पुत्ला च्याकेत्यंबलय् प्रहरीं सतकय् च्याके मते धकाः हस्तक्षेप याः वःगु खः। तर प्रदर्शनकारीतय्सं प्रहरीया प्रतिकार यानाः पुत्लायात सतकया दथुइ हे तयाः च्याकूगु खः ।
उगु इलय् अन संवोधन यासें नेवाः स्वायत्त राज्य मंकाः संघर्ष समितिया नायः नरेशवीर शाक्यं नेपाली जनतां याःगु आन्दोलनया उपलब्धी कथं चूलाःगु संघीय व्यवस्था व धर्म निरपेक्षता विरोधी फुकसित चेतावनी स्वरुप पुत्ला च्याकागु खः धासें थःपिनि ग्वसालय् थ्वहे जेठ १८ गते हाकुगु न्हि हने कथं बसन्तपुली जुइगु विशेष सभाय् ब्वति कायेत सकसितं आग्रह यानादिल ।
