सहमति कार्यान्वयन लिपा जक राष्ट्रिय सरकार : कांग्रेस
नेपाली कांग्रेसं माओवादीं न्हापाया सहमति कार्यान्वयन यायेधुंकाः जक राष्ट्रिय सहमतिया सरकार निर्माण यायेमाःगु निर्णय याःगु दु ।
आइतवाः सिंहदरवार स्थित संसदीय दलया ज्याकुथी च्वंगु संसदीय दलया बैठकं माओवादीं न्हापाः लडाकुया समायोजन व पुनर्स्थापना जुइगु ल्याः क्वःछिमाःगु, माओवादीं कब्जा यानातःगु छेँबुँ लितबीमाःगु, वाइसीएलया अर्धसैन्य संरचना भंग यायेमाःगु निर्णय याःगु दु । वर्तमान अवस्थाय् हे माओवदीयात ग्वाहालि यायेमफइगु धासें कांग्रेसं थ्व दक्वं खँ पूवनेधुंकाः जक राष्ट्रिय सरकार निर्माणया निंतिं लँपु चायेकेगु निर्णय बैठकं याःगु दु ।
अथेहे कांग्रेसं दच्छिया निंतिं थप याःगु संविधानसभाया समयसिमा दुने संविधान निर्माण यायेत क्रियाशील जुइगु निर्णय यासें शान्ति व संविधान निर्माण यायेगु ज्यायात प्राथमिकता बियाः न्ह्याः वनेमाःगु निष्कर्ष पिकाःगु दु ।
बैठकय् संसदीय दलया नेता रामचन्द्र पौडेलं शुक्रवाः स्वंगू दलत दथुइ शुक्रवा: बहनी जूगु सहमतिया बारे सभासद्तय्त जानकारी बियादीगु खः ।
