'प्याकेजय् सहमति लिपा जक राजीनामा'
सरकार समर्थित झिगू दलं प्याकेजय् सहमति जुइधुंकाः जक प्रधानमन्त्रीयात राजीनामा बीत सुझाव ब्यूगु दु । दलतय्सं माओवादी लडाकुया समायोजन व पुनर्स्थपना, कब्जा यानातःगु छेँबुँ लितबीगु खँय् माओवादीं या:गु प्रतिबद्धताया व्यवहारीक कार्यान्वयन जुइधुंकाः जक प्रधानमन्त्रीं राजीनामा बीत सुझाव ब्यूगु दु ।
आइतवाः सुथय् सरकारयात समर्थन याःगु झिगू दलया सहलहलय् प्रधामन्त्री माधवकुमार नेपालं स्वंगू दलं याइगु निर्णय थःत मान्य जुइगु धयादिल । वय्कलं शुक्रवाः बहनी प्रमुख स्वंगू दल दथुइ जूगु सहमतियात माओवादीं अपव्याख्या याःगु द्वपं बियादिसें न्यान्हु दुने थःम्ह राजीनामा बीमाःगु बारे थःम्हं छुं मस्यूगु धयादिल ।
बैठकय् थीथी नेतातय्सं शान्ति प्रकृया व संविधान निर्माणया स्पष्ट कार्ययोजना दयेकाः राष्ट्रिय सहमति निर्माण यायेमाःगु खँय् बः ब्यूगु खः ।
