अपहरण विरुद्ध चितवन बन्द
निवाः न्ह्यः निसें बेपत्ता जुयादीम्ह बिपि कोइराला क्यान्सर अस्पतालया कार्यकारी निर्देशक डा. भक्तमान श्रेष्ठयात मालेत दबाव बीत थीथी राजनीतिक दलतय्सं थौं चितवन बन्द याःगु दु । बेपत्ता जूगु झिंस्वन्हु दयेधुंकाः नं श्रेष्ठया अवस्था सार्वजनिक मजूगु धासें प्रशासनयात दबाब बती बन्दया आह्वान याःगु खः ।
एनेकपा (माओवादी), नेपाली कांग्रेस, नेकपा (एमाले), नेकपा (माले), राष्ट्रिय जनमोर्चा नापं भक्तमान बचाऊ अभियानं मंकाः रुपं बन्दया घोषणा याःगु खः । बन्दया कारणं चितवनया जनजीवन प्रभावित जूगु दु । बजाः, कलकारखाना, शैक्षिक संस्था पूर्ण रुपं बन्द जूगु दु । तर थनिंनिसें संचालन जूगु झिंछगू तिगंया परिक्षा धाःसा सुचारु जूगु दु ।
बन्दकर्तातय्सं बेपत्ता श्रेष्ठया आवस्था छानबिन यायेत उच्चस्तरीय छानबिन आयोग गठन यायेत माग याःगु दु । नापं उमिसं थौं सनिलय् तक नं श्रेष्ठया अवस्था सार्वजनिक मजुसाः अझ तच्वःगु आन्दोलन यायेगु ख्याच्वः ब्यूगु दु ।
