हाकुगु न्हि हनेत विशेष भेला
नेपालमण्डल बन्द मयाइगु
येँ महानगरपालिकां नेवाः भाय्यात ब्यूगु मान्यतायात १८ जेठ २०६५य् सर्वोच्च अदालतं खारेज यानाब्यूगु न्हियात लुमंका नेवाः स्वायत्त राज्य मंकाः संघर्ष समितिं थ्वहे जेठ १८ गते येँया बसन्तपुली छगू सभा यायेत्यंगु दु ।
सभाया तयारी स्वरुप संघर्ष समितिं जेठ १६ गते येँ व यलय् विशेष भेलात यायेत्यंगु दु । अथेहे १७ गते तोखा, किपुली व ख्वपय् नं विशेष भेला यायेत्यंगु दु । जेठ १८ गतेया विशेष सभा ताः लाकेगु ताः तयाः समितिं थीथी लागाय् थ्व विशेष भेलात यायेत्यंगु खः ।
थ्वहे दथुइ म्हिग समितिं संघीयता व धर्मनिरपेक्षता विरोधीतय् प्रतिक पुत्ला च्याकूगु दु । असनं पिहांवःगु जुलुस रन्तपार्क शान्ति बाटिका थ्यंका पुत्ला च्याकूगु खः । वयां लिपा: जूगु कोणसभाय् संघर्ष समितिया नाय: नरेशवीर शाक्य लगायतं न्ववानादीगु ख: ।
उखे जेठ १८ गते हाकुगु न्हि कुन्हु नेपालमण्डल बन्द यायेगु ज्याझ्वः धाःसा संघर्ष समितिं लितकाःगु दु । उच्च माविया झिंछगू तिगंया जाँच जुयाच्वंगु हुनिं परिक्षार्थीतय्त लिच्वमलाकेत बन्दया ज्याझ्वः लितकायाःगु खँ संघर्ष समितिं धाःगु दु ।
(किपा - नृपेन्द्रलाल श्रेष्ठ)
