न्हूगु संविधान जारी यानाः गणतन्त्र संस्थागत : राष्ट्रपति

राष्ट्रपति डा. रामवरण यादवं न्हूगु संविधान जारी यानाः गणतन्त्रयात संस्थागत यायेमाःगु खँय् बः बियादीगु दु ।

निक्वःगु गणतन्त्र दिवसया लसताय् शनिवाः राष्ट्रपतिया ज्याकू शितल निवासय् याःगु तुच्चा ज्याझ्वलय् वय्कलं आः सहमतिया आधारय् दच्छि न्ह्यः हे न्हूगु संविधान निर्माण यायेमाःगु धयादिल । वय्कलं न्हूगु संविधान निर्माण लिपा जक गणतन्त्र संस्थागत जुइगु धयादिसें दलतय्त आः मिलेजुयाः संविधान निर्माण यायेत इनाप यानादिल ।

तुच्चाय् प्रधानमन्त्री माधवकुमार नेपालं सहमतिया आधारय् हे न्ह्याः वनेगु प्रतिबद्धता प्वंकादिसें दच्छि न्ह्यः हे न्हूगु संविधान जारी यायेगु प्रतिबद्धता प्वंकादिल । तुच्च ज्याझ्वलय् प्रमुख दलया शीर्ष नेतातय् ब्वति दुगु खः ।