अग्रगामी व प्रतिगामी दथुइ निदँ निसें संघर्ष : भट्टराई
एनेकपा (माओवादी)या उपाध्यक्ष डा. बाबुराम भट्टराईं वंगु निदँ न्ह्य: निसें अग्रगामी व प्रतिगामी शक्तित दथुइ संघर्ष जुयाच्वंगु खँ धयादीगु दु ।
शनिवाः माओवादीं न्हूगु संविधानया मस्यौदा घोषणा यायेत येँ याःगु ज्याझ्वलय् वय्कलं निदँ निसें प्रतिगामी यथास्थितिवादीतय् गणतान्त्रिक संविधान निर्माण यायेगु चाहना व वास्तविक जनताया संविधान दयेकेगु पक्ष दथुइ ल्वापु जुयाच्वंगु धयादिल । वय्कलं माओवादीया न्हापांगु चाहना संविधानसभाया शान्तिपूर्ण लँपुपाखें जनतां चाहे जूगु संविधान निर्माण यायेगु जूगु धयादिल ।
१९ भाग व २७४ धारा दुगु न्हूगु संविधानया मस्यौदा सार्वजनिक यानादिसें वय्कलं शक्ति संतुलनाया आःया अवस्थाय् क्रान्ति लिपाया जनताया संविधानया थें अपेक्षा यायेमज्यूगु धयादिल । माओवादीं थौं सार्वजनिक याःगु संविधानया मस्यौदा सर्वहारा, श्रमजीवी वर्गया जक मखूगु धयादिसें थ्व दक्विसंया मंकाः सम्झौताया दस्तावेज जूगु धयादिल ।
भट्टराईं शुक्रवाः बहनी जूगु सम्झौतायात चेक मार्फतया कालबिला जूगु धयादिसें थौं सार्वजनिक बिदा जूगुलिं चेक हिले मफुगु धयादिल । वय्कलं यदि उगु चेक बाउन्स जुसाः ब्याज सहति भुक्तानि गुकथं कायेमाःगु खँ थःपिंसं स्यूगु धयादिल ।
अथेहे वय्कलं खिँउगु क्वथाय् च्वनाः राजतन्त्र लितहेगु कुतः जुयाच्वंगु धयादिसें छुं नं हालतं राजतन्त्र लिहांवयेमफइगु धयादिल । वय्कलं अग्रगमनया बाधक जुइपिं शक्तितय्त मत्वतेगु ख्याच्वः नं बियादिल ।
