'राजनीतिक मनमुटावया कारणं इलय् संविधान निर्माण मजूगु'
प्रधानमन्त्री माधवकुमार नेपालं राजनीतिक दलत दथुइया मनमुटावया कारणं इलय् हे संविधान निर्माण जुइमफुगु खँ धायदीगु दु । वय्कलं राजनीतिक दलत दथुइया विमतिया कारणं मनमुटाव जुयाः सहमतिया यात्राय् अवरोध जुइत सुरु जूगुलिं संविधान निर्माण जुइमफुगु धयादिल ।
निक्वःगु गणतन्त्र दिवसया लसताय् गणतन्त्र दिवस मुल समारोह समितिं शनिवाः येँया तिंख्यलय् ग्वसाःग्वःगु विशेष समारोहयात सम्बोधन यानादिसें प्रधानमन्त्री नेपालं माओवादी प्रति लक्षित यानादिसें संविधानसभाया चुनावया झ्वलय् दलत त्याःगु व बूगु विषयात महत्व ब्यूगुलिं इलय् संविधानसभा जुइमफुगु धयादिल ।
वय्कलं धयादिल, 'संविधानसभाया निर्वाचनय् सुनां त्याःगु व बूगु रुपय् गुकथं चित्रण यात, सहमतिया यात्राय् अवरोध थनं हे सुरु जूगु खः ।' वय्कलं थुकीया कारणं निदँ तक झीसं भागे यायेमाःगु यथार्थयात स्वीकार मयासें हानं नं सहमतिया यात्राय् न्ह्याः वनेमफइगु धयादिल ।
न्हापाया खँ कुला च्वंसाः वर्तमानय् अवरोध जुइगु धयादिसें प्रधानमन्त्री नेपालं न्हापाया खँ ल्वमंकाः थौंया ज्ययात महत्व बीत राजनीतिक दल व नेतातय्त इनाप यानादिल । वय्कलं शान्ति सम्झौता निसें आः तक दलत दथुइ यक्व हे विमति जुसां निदृष्ट लक्ष्यया निंतिं सहमति, सहकार्य व एकताया विकल्प मदुगु धयादिल ।
ज्याझ्वलय् राष्ट्रपति डा. रामवरण यादव, उपरराष्ट्रपति परमानन्द झा, सभामुख सुवासचन्द्र नेम्वाङ, प्रधानन्यायाधीश डा. रामप्रसाद श्रेष्ठ लगायत मन्त्री, कुटनीतिक नियोगया अधिकारी लगायत उच्च सरकारी कर्मचारीतय् ब्वति दुगु खः ।
