म्याद थपयात अमेरिका, जापान व इयु पाखें लसकुस
संविधानसभाया म्याद थप यायेगु ज्यायात अमेरिका, जापान व इयुं लसकुस याःगु दु । उमिसं थौं छगू विज्ञप्ति पिथंसें शान्ति व संविधान निर्माण यायेगु ज्याय् थुकीं महत्वपूर्ण तिबः बीगु खँ धाःगु दु ।
अमेरिकां छगू विज्ञप्ति पिथंसें राजनीतिक दलतय्सं संविधानसभाया म्याद थप यानाः दच्छिया दुने संविधान निर्माण यायेगु ज्याय् क्यंगु प्रतिवद्धता प्रति लसता प्वंकूगु दु । राजनीतकि दलत दथुइ संवादया माध्यमं हे शान्ति प्रकृया, सेना समायोजन व पुनर्स्थापना क्वचायेकेत नं अमेरिकां इनाप याःगु दु ।
अथेहे जापान सरकारया पाखें जापानी राजदूतावासं पिथंगु विज्ञप्तिइ म्याद थप याःगु खँय् लसता प्वंकूगु दु । नापं जापानं म्याद थप यायेगु ज्या पाखें दलत प्रजातन्त्र व शान्ति प्रकृया प्रति दलत प्रतिवद्ध दुगु खँ न्ह्यथंगु दु ।
उखे युरोपियन युनियनया प्रतिनिधि राष्ट्रतय्सं नं म्याद थपयात लसकुस याःगु दु । इयुं अन्तिम इलय् जूगु उपलब्धिया कारणं नेपाली जनता अवरोध पाखें पार जुइगु धासें राजनीतिक दलत संविधान निर्माण यायेगु ज्यायात पूर्णता बीगु खँ थःपिं विश्वस्त जूगु खँ धाःगु दु । नापं इयुं विस्तृत शान्ति सम्झौताया भावना अनुरुप दलत मिले जुयाः देय् व जनाताया हितय् ज्या यायेमाःगु खँय् बः ब्यूगु दु ।
