थौं गणतन्त्र दिवस / देय्न्यंक थीथी ज्याझ्वः

राष्ट्रपति पाखें भिंतुना सन्देश

थौं निक्वःगु गणतन्त्र दिवस । निदँ न्ह्यः थौंया हे न्हि कुन्हु च्वंगु संविधानसभाया न्हापांगु बैठकं गणतन्त्र कार्यान्वयन याःगु खः । संविधानसभाया बहुतम सभासद्तय्सं गणतन्त्रया पक्षय् मत बीधुंकाः अन्तरिम संविधानयात संशोधन यायेधुंका २४० दँ न्ह्यः निसेंया राजतन्त्रात्म व्यवस्थाया विधिवत अन्त्य जूगु खः ।

गणतन्त्र दिवसया लसताय् राष्ट्रपति डा. रामवरण यादवं छगू विज्ञप्ति पिथना भिंतुना सन्देश बियादीगु दु । वय्कलं राष्ट्र व राष्ट्रियताया निंतिं दक्वं नेपाःमियात छप्पँ जुयादीत इनाप यानादीगु दु । वय्कलं शान्ति प्रकृया व संविधान निर्माण यायेगु ज्या छगू हे सिक्काया निगू पाटा जूगु व छगूया सफलता वा असफलता मेगू खँय् निर्भर जुइगु तथ्ययात हृदयंगम यानाः थ्व निगूलिं ज्यायात नापं यकेत इनाप यानादीगु दु ।

वय्कलं न्हापाया कमजारी पाखें स्यनाकयाः राष्ट्रया हितय् दृढतापूर्वक न्ह्यावनेगुया विकल्प मदुगु धयादिसें व्यक्तिगत व दलीय स्वार्थ नापं आग्रह-पूर्वाग्रह पाखें च्वये दनाः देय व जनतायात केन्द्रय् तयाः बिचाः यायेफुसाः लोकतन्त्र, गणतन्त्र व संघीयताया संस्थागत सुनिश्चितताया निंतिं संविधान निर्माण यायेत झी थः हे सक्षम दुगु धयादिल ।

थ्वहे झ्वलय् गणतन्त्र दिवसया लसताय् गणतन्त्र दिवस मूल समारोह समितिं देय्न्यंक थीथी ज्याझ्वः यायेत्यंगु दु । मूल समारोह समितिं मू समारोह येँया तिंख्यलय् यायेत्यंगु दु । सरकारं गणतन्त्र दिवस तःजिक दिपावली यानाः न्यायेकेत सकल नेपाःमियात इनाप याःगु दु । गणतन्त्र दिवसया लसताय् सरकारं थौं सार्वजनिक बिदा बियातःगु दु ।