संविधानसभाया म्याद दच्छिया निंतिं थप
संविधानसभाया म्याद दच्छिया निंतिं थप याःगु दु । शुक्रवाः बहनी च्वंगु व्यवस्थापिका संसदया बैठकं संविधानसभाया म्याद दच्छिया निंतिं थप यायेत सरकारं पेश याःगु संविधान संशोधनया विधेयकयात दुई तिहाइ बहुमतं पारित याःगु दु ।
प्रमुख स्वंगू दलत दथुइ अन्तिम इलय् जूगु सहमति लिपा शुक्रवाः बहनी ११:४० बजे जक व्यवस्थापिका संसदया बैठक च्वंगु खः । उगु बैठकय् कानुन मन्त्री प्रेमबहादुर सिंहं सरकारया पाखें संविधानसभाया म्याद दच्छिया निंतिं थप यायेमाःगु धासें नेपाःया अन्तरिम संविधान २०६३लय् च्याक्वःगु संशोधन प्रस्ताव संसदय् पेश यानादीगु खः ।
उगु प्रस्तावय् राष्ट्रिय प्रजातन्त्र पार्टी नेपालया सभासद् चन्द्रबहादुर गुरुङं विरोध यायेवं मतदान प्रकृयाय् वंगु खः । प्रस्तावय् जूगु मतदानय् राप्रपा नेपालया न्याम्ह सभासद्त बाहेक दक्वसिनं समर्थनय् मतदान याःगु खः । ५८५ म्ह सभासद्त उपस्थित दुगु शुक्रवाःया बैठकय् ५८० म्ह सभासद्तय्सं संविधान संशोधनया पक्षय् मतदान याःगु खःसा राप्रपाया ५ म्ह सभासदतय्सं विपक्षय् मतदान याःगु खः ।
मन्त्री सिंहं संसदय् संविधान संशोधनया प्रस्ताव पेश यानादी न्ह्यः माओवादी सभासद्त देव गुरुङ व सद्भावनाया सभासद् सरिता गिरीं सरकारं दर्ता याःगु संशोधन प्रस्तावय् ब्यूगु विरोध सूचं लितकाःगु खः । अथेहे माओवादी सभासद् पोष्टबहादुर बोगटीं निगू नियम निलम्बनया प्रस्ताव यानादीगु खःसा उकीयात कांग्रेस व एमालेया सभासद्तय्सं समर्थन याःगु खः ।
व्यवस्थापिका संसदया मेगू बैठक सोमवाः न्हिनसिया स्वताः इलय् च्वनीगु जूगु दु ।
