स्वंगू दल दथुइ संविधानसभाया म्याद थप यायेगु सहमित
अन्ततः स्वंगू राजनीतिक दलत दथुइ संविधानसभाया म्याद थप यायेगु बारे सहमति जूगु दु । संविधानसभाया म्याद क्वचायेत १ धण्टा जक ल्यं दनीगु इलय् प्रमुख स्वंगू दल दथुइ थुगु सहमति जूगु दु ।
प्रधानमन्त्रीं अविलम्ब राजीनामा बीगु व माओवादीं संविधान सभाया म्याद थप यायेगु संविधान संशोधन विधेयकया पक्षय् मतदान यायेगु सहमति जूगु खँ कांग्रेस प्रवक्ता अर्जुननरिसंह केसीं धयादीगु दु । तर वय्कलं सहमतिलय् प्रधानमन्त्रीं राजीनामा बीगु निश्चित तिथि धाःसा मदुगु धयादिल ।
शान्ति प्रकृया, उकीया प्रतिबद्धता व कार्यान्वयनया सुनिश्चितता व संविधान निर्माणया कार्यतालीया बारे प्याकेजय् सहमति जुइधुंकाः प्रधानमन्त्रीं राजीनामा बीगु धयादिसें केसीं थ्व स्वन्हु-प्यन्हु दुने नं जुइफइगु धयादिल ।
अथेहे दलत दथुइ सहमतिया आधारय् शान्ति प्रकृया न्ह्याकेगु बारे नं सहमति जूगु दु । थ्वनापं अन्ततः संविधानसभाया म्याद थप जुइगु जूगु दु ।
