बैठकया कार्यसूची प्रकाशित
राजनीतिक दलत दथुइ सहमति जुइमफया व्यवस्थापिका संसदया बैठक निश्चित मजुनीसां थुकीया कार्यसूची धसाः पिहांवःगु दु । कायसूची कथं माओवादी नेता देव गुरुङ व सदभावना पार्टीयाया अध्यक्ष सिरता गिरीं सरकारं संविधानसभाया म्याद थप यायेत दर्ता याःगु संविधान संशोधनया विधेयकय् विरोधया सूचं दर्ता याइगु ज्याझ्वः दु ।
उकी सहलह यायेधुंकाः कांग्रेसया प्रमुख सचेतक लक्ष्मण घिमिरें संसद नियमावली निलम्बन प्रस्ताव पेश यानादी । दलतय्सं थ्वस्वयां न्ह्य: सहमतिया निंतिं ई म्हो जूगुलिं नियमावली निलम्बन यायेगु सहमति या:गु ख: । वयां लिपा कानुन मन्त्री प्रेमबहादुर सिंहं सरकारया पाखें संविधानसभाया म्याद दच्छिया निंतिं थप यायेगु विधेयक पेश यानादी ।
तर माओवादीं दर्ता याइगु विरोधया सूचंया पक्षय् दुई तिहाई सभासद्तय्सं मत ब्यूसाः कानुनी रुपं सरकारं पेश याइगु विधेयक खारेज जुइ । अथे जूसां माओवादीया विरोध सूचं पारित जुइगु सम्भावना मदुसाः उखे माओवादीया समर्थन बिनाः सरकारं पेश याइगु विधेयक दुई तिहाई मतं पारित जुइफइगु सम्भावना नं मदु ।
