राजीनामा बीमखु : प्रम

संविधानसभाया म्याद क्वचायेत्यंगु इलय् प्रधानमन्त्री माधवकुमार नेपालं हानं छक्व: थःम्हं राजीनामा मबीगु खँ धयादीगु दु । राष्ट्रपति डा. रामवरण यादव नाप शितल निवासय् खँल्हाबंला यायेधुंकाः प्रधानमन्त्रीया थ्व धापू सार्वजनिक जूगु दु । वय्कलं थःगु पक्षय् बहुमत सभासदया समर्थन दुगुलिं राजीनामा मबीगु खँ धयादीगु खः । नापं वय्कलं माओवादीयात सत्ता मा:गु ख:सा लोकतान्त्रिक प्रकृया पाखें वयेत हाथ्या बियादिल ।

अथेहे प्रधानमन्त्रीया प्रेस सल्लाहकार विष्णु रिजालं प्रधानमन्त्रीं छुं नं हालतं राजीनामा मबीगु खँ धयादीगु दु । वय्कलं माओवादीया मागयात स्थापित यायेत जक प्रधानमन्त्रीं राजीनामा मबीगु धयादिल । वय्कलं संविधानसभाया ई थप मजुसा: उकीया जिम्मेवार माओवादी जुइगु धयादिसें संविधानसभा भंग जुसां वर्तमान सरकार यथावत जुइगु खँ धयादीगु दु ।