दलत दथुइ अझ नं सहमति मजुनी
संविधानसभाया निर्धारित ई क्वचायेत ४ घण्टा जक ल्यं दनीगु इलय् नं प्रमुख स्वंगू राजनीतिक दलया नेतात दथुइ सहमति जुइफुगु मदुनी । स्वंगू दलया शीर्ष नेतात दथुइ संविधानसभा भवनय् च्वंगु बैठकय् संविधनसभाया म्याद थप यानाः प्रधानमन्त्रीं राजीनमा बीगु खँय् सहमति जूगु खः । तर सहमति पत्रय् च्वयेगु खँग्वलय् अझ नं सहमति जुइमफुनी खँ सीदुगु दु । माओवादीं प्रधानमन्त्रीं राजीनामा बीगु धकाः तिथि सहित च्वयेमाःगु अडान काःगु दुसाः कांग्रेस व एमालें प्रधानमन्त्रीं राजीनमा बीगु पलेसाः 'राष्ट्रिय सहमतिया निंतिं मार्ग प्रशस्त' यायेगु धकाः च्वयेमाःगु खँ धयाच्वंगु दु ।
उखे प्रधानमन्त्री माधवकुमार नेपालं छुं ई न्ह्यः राष्ट्रपति डा. रामवरण यादवयात नापलाना खँल्हाबंला यानादीगु दु । शितल निवास थ्यंकाः प्रधानमन्त्री नेपालं दलत दथुइ जुयाच्वंगु सहलहया बारे जानकारी बियादीगु खः । वय्कपिं दथुइ संविधानसभाया कार्यकाल थप यायेगु व गतिरोध व सम्भावित परिस्थितिया बारे सहलह जूगु खः । उगु इलय् राष्ट्रपति यादवं प्रधानमन्त्रीयात सहमतिया माध्यमं हे संविधानसभाया म्याद थप यायेत इनाप यानादीगु खः ।
अथेहे संविधानसभा भवन दुने हे एमाले स्थायी समितिया बैठक न्ह्याःगु । एमालेया सभासद्त पाखें हे प्रधानमन्त्रीं राजीनामा बीमाःगु माग अप्वयेवं स्थायी समितिया बैठक च्वंगु खः । एमालेया खुइम्ह स्वयां अप्व सभासद्तय्सं प्रधानमन्त्रीं राजीनामा बीमा:गु धासें सभामुखयात ल्हा:चिं ल:ल्हा:गु ख: । बैठकय् ब्वति कायेत एमाले उपाध्यक्ष बामदेव गौतम व वरिष्ठ नेता केपी शर्मा ओली संविधानसभा भवन थ्यंकादीगु दु ।
