संविधानसभा भवन पिने छु जुयाच्वन?
संविधानसभाया म्याद थप बारे दलत दथुइ सहमति जुइ वा मजुइ धइगु चिन्ताया दथुइ आपालं मनूत संविधानसभा भवन पिने जम्मा जुयाच्वंगु दु । संविधानसभा भवन दुने राजनीतिक दलत दथुइ अझ नं सहमति जुइमफुनीगु इलय् पिने धर्नाय् च्वनाच्वंपिं अन्यौलया अवस्थाय् लानाच्वंगु दु ।
छुं नं हालतं संविधानसभाया म्याद थप यायेमाःगु माग सहित नागरिक समाज, नेपाल आदिवासी महासंघ दलिततय् संस्था लगायत आम नेपाःमित धर्नाय् च्वनाच्वंगु दु ।
संविधानसभा भवन पिने हे आपालं माओवादी कार्यकर्तात नं मुनाः च्वंगु दु । छुं ई न्ह्यः जक माओवादीतय्सं अन हे जुलुस पिकागु खः । वस्वयां न्ह्यः माओवादीं प्रधानमन्त्रीं राजीनामा बीमाःगु धासें प्रधानमन्त्रीया पुतला च्याकूगु खः ।
अथेहे छुं ई न्ह्यः संविधानसभा भवनया दक्षिण गेट नापसं बम विष्फोट जूगु दु । विष्फोट सामान्य जूगु व उकीं छुं नं क्षति धाःसा मजूगु खँ धा:गु दु । बम ट्रली बस पाखेया सिमांय् तयातःगु खँ प्रहरीं धाःगु दु । विष्फोट सुनां व छाय् याःगु खँ सीमदुनी । प्रहरीं उगु घटनाया बारे अनुसन्धान न्ह्याकूगु दु ।
