छगू हे स्कूलया प्यम्ह विद्यार्थी निवाः न्ह्यवंनिसें बेपत्ता
येँ (सन्ध्या टाइम्स)/येँया सामाखुसिइ च्वंगु छगू निजी स्कूलय् आखः ब्वनीपिं प्यम्ह मस्त वंगु निवाः न्ह्यवंनिसें बेपत्ता जुयाच्वंगु दु। उमित मालेत स्कूल, प्रहरी नापं सम्बन्धित थःथितिपिंसं कुतः यानाच्वंसां सफल धाःसा जुयाच्वंगु मदुनि। सामाखुसिया प्याराडाइमन पब्लिक स्कूलय् ब्वनीपिं थ्व विद्यार्थीत वंगु जेष्ठ २ गतेनिसें बेपत्ता जुयाच्वंगु खः ।
उगु स्कूलया ३ कक्षाय् ब्वनीम्ह अजय श्रेष्ठ, ५ कक्षाया सुवास तामाङ, १० कक्षाया सरोजराज धामी व राजेन्द्र बेपत्ता जुयाच्वंगु खः। उपिं फुक्कं झिंनिदँनिसें झिंच्यादँ दुपिं खः। उपिं थःगु लाकां छजु छजु व वसः छजु छजु ज्वनाः वंगु २ गते चान्हय् बिसिउँ वंगु खः ।
स्कूलय् बहनीसिया ट्यूसन क्वचायेकाः चान्हय् लिउनेया लँपुं बिसिउँ वंगु खयेमाः धकाः प्याराडाइमन स्कूलया इन्चार्ज निकम श्रेष्ठं कनादीगु दु ।
बेपत्ता जूपिं विद्यार्थीत अजय श्रेष्ठ भोजपुरयाम्ह खःसा राजेन्द्र गुल्मीयाम्ह, सुवास नुवाकोटयाम्ह व सरोज यलयाम्ह खः। थ्व मस्त बेपत्ता जुयाच्वंगु बारे स्कूलं अभिभावकतय्त जानकारी बीधुंकूगु दु। बिसिउँ वंपिं मस्त मध्यमस्तरया विद्यार्थी खः ।
उपिं दइगु सम्भावित फुक्कं थासय् मालाः नं लुया मवःगुलिं घटनायात सार्वजनिक याःगु खँ धाःगु दु। आः इमित मालेगु ज्या प्रहरी व स्कूलं तीव्र रुपं न्ह्याकूगु दु ।
