संविधानसभा भंग जूसा हानं जनसरकार

येँ (सन्ध्या टाइम्स)/थौं सुथय् च्वंगु माओवादीया पोलिटब्युरो बैठकं यथा अवस्थाय् संविधानसभाया म्याद थपे याये फइ मखु धकाः निर्णय याःगु दु। संविधानसभाया म्याद थपे यायेगु बारे थौं सदनय् छलफल जुइ न्ह्यः च्वंगु पार्टीया पोलिटब्युरो बैठकं थ्व निर्णय याःगु खः ।

उखे म्हिगः बहनी लिबाक च्वंगु एमाले स्थायी समितिया बैठकं प्रधानमन्त्रीं राजीनामा बीम्वाः धकाः निर्णय याःगु दु। बैठकय् पार्टी अध्यक्ष झलनाथ खनाल, उपाध्यक्ष वामदेव गौतम व युवराज ज्ञवालीं कडा रुपं हे आः प्रधानमन्त्रीं राजीनामा बिउसां जिउ धकाः बिचाः तःगु खःसा अशोक राईनं हल्का रुपं राजीनामा यायेत इनाप याःगु खः। प्रम माधव नेपाल, खड्ग ओली, विद्या भण्डारी, शंकर पोखरेल, भरतमोहन अधिकारी व विष्णु पौडेलं राजीनामा यायेमाःगु छुं हे आवश्यकता मदु धासें संविधानसभा माओवादीया मुद्दा जूगुलिं छु यायेमाःगु खः उमिसं हे याइ धकाः बिचाः तःगु खः।
थ्वहे झ्वलय् म्हिगः सक्व वनेगु लँय् थलीइ च्वंगु छगू कार्यकर्ता भेलाय् माओवादी अध्यक्ष प्रचण्डं थुपालय् थःपिंसं आत्मसमर्पण याइ धकाः सुं हे भ्रमय् च्वने मते धकाः आश्वासन बियादीगु खँ सीदुगु दु। यदि संविधानसभाया म्याद थपे हे जुल धाःसां नं झीसं धया थेंज्याःगु संविधान मवइगु जूगुलिं थ्व संविधानसभा भंग जूसां झीत छुं हे पाइ मखु धकाः वय्कलं कनादीगु खः। भंग जुइसातकि कार्यकर्तात गांगामय् वनाः जनसरकार हानं चले यायेगु व विकास निर्माणया ज्या न्ह्याकाः सरकारयात हाथ्या बीगु खँ नं वय्कलं कनादिल ।