माओवादीं संशोधन विधेयकया विपक्षय् मतदान याइगु
एकीकृत नेकपा (माओवादीं) सरकारं संविधानसभाया म्याद थप यायेत व्यवस्थापिका संसदय् दर्ता याःगु विधेयकया विरुद्ध मतदान यायेगु निर्णय याःग दु । शुक्रवाः येँया न्हूगु बानेश्वर स्थित संविधानसभा भवनय् च्वंगु पार्टी स्थायी समितिया बैठकं थःगु पुलांगु हे अडान कायम यासें सरकारं दर्ता याःगु संविधान संशोधन विधेयकया विरुद्ध मतदान यायेगु निर्णय याःगु खः ।
थ्वस्वयां न्ह्यः बिहीवाः बहनी च्वंगु माओवादी स्थायी समितियया बैठकं यथास्थितिलय् संविधानसभा म्याद थप यायेमफइगु निर्णय याःगु खः । वर्तमान सरकार शान्ति व संविधान निर्माण यायेगु ज्याय् असफल जुइधुंकूगु धासें सरकार विघटन व राष्ट्रिय सहमति जुसाः जक संविधान संशोधनया पक्षय् मतदना यायेफइगु खँ क्वःछिउगु खः । थौं च्वंगु बैठकय् नं माओवादी उगु हे निर्णयलय् अडिक जूगु खः ।
अथेहे बैठकं बिपि कोइराला क्यान्सर मेमोरियल अस्पतालया कार्यकारी निर्देशक डा. भक्तमान श्रेष्ठया अपहरण माओवादीं याःगु धकाः थौं छगू राष्ट्रिय न्हिपौ नं पिथंगु बुखँ प्रति थःगु पार्टीया गम्भीर ध्यानाकर्षण जूगु खँ धाःगु दु ।
बैठकं उगु बुखँ प्रायोजित व षड्यन्त्रपूर्ण जूगु ठहर यासें पार्टी महासचिव रामबहादुर थापा लगायतया नेतातय् चरित्रहत्या यायेत स्वःगु धासें भर्त्सना याःगु दु । माओवादीं उगु घटनाया बारे अनुसन्धान जुयाच्वंगु इलय् उकीयात प्रभावित यायेत व ध्यान मेथाय् केन्द्रीत यायेत स्वःगु द्वपं ब्यूगु दु ।
