संविधानसभाया बारे राष्ट्रसंघीय महासचिवया चिन्ता
संविधानसभाया म्याद क्वचायेत छन्हु जक ल्यं दुगु इलय् नं राजनीतिक दलत दथुइ सहमति जुइमफयाच्वंगु धासें राष्ट्रसंघया महासचिव वानकी मुनं चिन्ता प्वंकादीगु दु ।
महासचिव वानया प्रवक्तां शुक्रवाः पिथनादीगु विज्ञप्तिइ संविधानसभाया म्याद थपे यायेगु खँय् राजनीतिक मतभिन्नताया कारणं राजनीतिक दलत दथुइ अझ सहमति यायेमफुगु खँय् चिन्ता प्वंकूगु दु । न्हूगु संविधान निर्माण यायेगु ज्याय् संविधानसभां याःगु प्रगति व संविधानसभा नं शान्ति प्रकृयाय् महत्वपूर्ण व कठिनताया साथ प्राप्त उपलब्धिया प्रतिनिधित्व याइगु खँ न्ह्यथंसें विज्ञप्तिइ संविधानसभा व शान्ति प्रकृयायात बचे यायेगु उदेश्यं पुनः ऐक्यबद्ध जुइत राजनीतिक दलया नेतातय्त इनाप याःगु दु ।
वानं आःया इलय् राष्ट्रिय स्वार्थ हे सर्वोपरी जुइगु धासें राजनीतिक दलतय्त सहमतिया निंतिं बः बियादीगु दु ।
