संविधान संशोधनया पक्षय् मतदान यायेत एमालें ह्वीप जारी
नेकपा (एमालें) संविधानसभाया म्याद थप यायेत सरकारं दर्ता याःगु संविधान संशोधनया पक्षय् मतदना यायेत थःगु सभासद्तय्त ह्वीप जारी याःगु दु ।
संविधानसभाया लिप्पांगु न्हि शुक्रवाः च्वंगु एमाले संसदीया दलया बैठकय् पार्टी अध्यक्ष झलनाथ खनालं संविधानसभाया म्याद थप मजुसाः संवैधानिक व राजनैतिक रिक्तता जुइगु धयादिसें मतदान यायेत इनाप यानादीगु खः ।
बैठक न्ह्यायेवं प्रधानमन्त्री माधवकुमार नेपालं संविधानसभाया म्याद थप यायेत सभासद्तय्त इनाप यानादीगु खः । उगु बैठकय् प्रधानमन्त्रीं राजीनामा बियाः राजनीतिक निकास बीमाःगु खँय् सभासद्त विभाजित जूगु दु ।
पार्टी अध्यक्ष खनाल पक्षभर सभासद्तय्सं प्रधानमन्त्रीं राजीनामा बियासां माओवादीयात संविधानसभाया म्याद थप यायेगु पक्षय् मतदान याकेमाःगु खँ धाःगु खःसा प्रधानमन्त्री नेपाल व वरिष्ठ नेता ओली पक्षधर सभासद्तय्सं सहमति मजुतल्ले प्रधानमन्त्रीं राजीनामा बीमज्यूगु अडान काःगु खः ।
