थौं संविधानसभाया अन्तिम न्हि
थौं चान्हय् झिंनिताः ई तक राजनीतिक दलत दथुइ सहमति जुयाः संविधानसभाया ई थप मयसाः सम्भवतः संविधानसभा कन्हय् निसें भंगु जुइ । २०६५साल चैत २८ गते जूगु संविधानसभाया निर्वाचन लिपा गठन जूगु संविधानसभायात थौंया हे न्हि दुने संविधानसभा पाखें न्हूगु संविधान जारी यायेमाःगु व्यवस्था दुगु खः ।
संविधानसभाया न्हापंगु बैठक च्वंगु निदँया दुने संविधानसभा पाखें न्हूगु संविधान जारी यायेमाःगु व्यवस्था याःगु खःसां उगु न्हि तक संविधान जारी यायेमफुसाः खुलाया निंतिं म्याद थप यायेफइगु व्यवस्थायात अन्तरिम संविधानं सुनिश्चित यानातःगु दु ।
तर थौं राजनीतिक दलत दथुइ संविधानसभाया म्याद थप यायेगु वा मयायेगु बारे सहमति जुइमफयाच्वंगुलिं संविधानसभा अन्यौलतग्रस्त अवस्थाय् लानाच्वंगु दु । प्रमुख स्वंगू दलत माओवादी, कांग्रेस व एमाले थःथःगु अडानय् अडिक जुइवं दलत दथुइ सहमति जुइफुगु मदु ।
माओवादीं प्रधानमन्त्री माधवकुमार नेपाल नेतृत्वया सरकार शान्ति व संविधान जारी यायेत असफल जूगुलिं थ्व सरकारया विघटन व राष्ट्रिय सहमतिया माग यानाच्वंगु दुसाः कांग्रेस व एमाले प्यकेजय् हे सहमति मयायेकं प्रधानमन्त्रीं राजीनामा बीमफइगु अडान कयाच्वंगु दु ।
थंज्याःगु राजनैतिक अन्यौलया दथुइ जनमानसय् नं संविधानसभाया माद थप जुइ वा मजुइ धइगु खँ चिन्ताया विषय जुयाच्वंगु दु ।
