एमाले नं थःगु हे अडानय् अडिक / प्रधानमन्त्रीं राजीनामा मबीगु
नेकपा (एमाले) स्थायी कमिटीया बैठकं माओवादीया शर्त कथं प्रधानमन्त्रीं छुं नं हालतं राजीनामा मबीगु निर्णय याःगु दु । एमाले स्थायी समितिया बैठकं छुं ई न्ह्य: केन्द्रीय कमिटीया बैठकं याःगु निर्णय प्रति थःपिं अडिक जूगु धासें दक्वं समस्याया समाधान प्याकेजय् हे यायेगु निर्णय याःगु दु ।
बिहीवाः हे च्वंगु माओवादी स्थायी समितिया बैठकं यथास्थितिलय् प्रधानमन्त्रीया राजीनामा बिना संविधानसभाया म्याद थप मयायेगु निर्णय या:गु ख: । उगु निर्णय लिपा च्वंगु एमालेया बैठकं माओवादीया उगु शर्त माने यायेमफइगु निर्णय याःगु खः । अथेहे बैठकं स्वंगू दलत दथुइया वार्तायात तीव्रता बीगु निर्णय नं याःगु दु ।
बैठक लिपा पत्रकारत नाप खँल्हाबंला यानादिसें एमाले अध्यक्ष झलनाथ खनालं माओवादी शर्तया आधारय् प्रधानमन्त्रीं राजीनामा यायेमज्यूगु निर्णय जूगु कनादिल । वय्कलं सहमतिया विकल्प मदुगु धयादिसें कन्हय् तकया दुने सहमित जुयाः संविधानसभाया म्याद थप यायेगु बारेया संविधान संशोधन पारित जुइगु दावी यानादिल ।
