म्याद थप यायेत झिंनिगू दलया इनाप

सरकारयात समर्थन यानाच्वंगु झिंनिगू दलं संविधानसभाया म्याद थप यायेत माओवादीयात इनाप याःगु दु । सिंहदरवारय् च्वंगु झिंनिगू दलया बैठकं म्याद थप मजुसाः देशय् राजनीतिक व वैधानिक शुन्यता जुइगु धासें संविधानसभाया म्याद थप यायेत माओवादी नापं प्रमुख स्वंगू दलयात इनाप याःगु दु ।

दलतय्सं न्हापा संविधानसभाया म्याद थप यायेत सरकारं दर्ता याकूगु संविधान संशोधनया विधेयक पारित यायेमाःगु व वयां लिपा स्ववाःया दुने राष्ट्रिय सरकार दयेकेत सहलह यायेमाःगु निर्णय बैठकं याःगु जानकारी नेकपा (माले)या महासचिव सीपी मैनालीं बियादिल ।

संविधानसभा म्याद थपया बारे प्रमुख दलत दथुइ सहमति जुइमफुगु इलय् चीचीधंगु दलतय्सं सहमतिया आधारय् संविधान निर्माण यायेत व शान्ति प्रकृयायात क्वचायेकेत दलतय्त थःथःगु हठ त्याग यायेत इनाप याःगु दु ।