सुरक्षाया स्थिति स्यनावन : एम्नेष्टी
एम्नेष्टी इन्टरनेसनलं नेपालय् हिंसात्मक घटना अप्वया वनाः सुरक्षाया अवस्था स्यनावंगु खँ धाःगु दु । हिंसात्मक घटना अप्वयावंगु व घटनाया दोषीयात आवश्यक कारवाही मजूगुलिं असुरक्षा अप्वयावनाच्वंगु खँ धाःगु दु ।
अन्तर्राष्ट्रिय मानवअधिकारवादी संस्था एम्नेष्टीं बिहीवाः सार्वजनीक याःगु वार्षिक प्रतिवेन २०१० : विश्वया मानवअधिकारया अवस्थाय् नेपा:या राज्य व सशस्त्र पुचलं आपालं मनूत स्याःगु, अपहरणया घटना अप्वयावंगु धासें शान्ति सम्झौतां नागरिक, राजनीतिक, आर्थिक, सामाजिक व सांस्कृतिक अधिकारया सम्बन्धय् प्वंकूगु प्रतिवद्धता पूमवंगु व राजनीतिक मतभेद व सशस्त्र पुच अप्वयावंगु खँ शान्ति प्रकृया निंतिं हे हाथ्या जूगु खँ न्ह्यथनातःगु दु ।
नेपा:या तराई क्षेत्रय् सच्छि स्वयां अप्व सशस्त्र पुचः सक्रिय जूगु व अप्व यानाः उमिसं पहाडी मूलया मनूतय्त अपहरण यायेगु नापं सार्वजनिक सम्पत्तिलय् आक्रमण याःगु खँ धाःगु दु । अथेहे माओवादीया क्यान्टोनमेन्टय् दुगु बाल सैन्ययात अझ नं मुक्त मयाःगु व मिसा मानवअधिकार रक्षकयात धम्की बीगु, दायेगु व हत्या यायेगु ज्या जुयाच्वंगु खँ प्रतिवेदनय् न्ह्यथनताःगु दु ।
